مش بعاكس (أرابيش)

شيء مش مفهوم صداع في دماغي طول اليوم كتر التفكير إزاي الضغط علينا كتير ليه مش عارفين نمشي في شارع مش خايفين و المعاكسات مالية الطرق و الميادين فين أيام زمان الشهامة راحت فين كان فيه احترام بين البني أدمين دايماً بيقولوا علينا إن احنا الغلطانين ده إللي بيحصل شايفينه و ساكتين كل أتوبيس .. كل شارع .. في الجامعة و في التليفون في ناس كتير بتعاكس .. الواحد مصدوم أطفال بتعاكس في السينمات .. و الشارع وقت الأعياد و يقولوا للبنات " اوه يا جميل أنا مش بعاكس " عندي عربية و شقة و جاهز ليه في أي مكان بنمشي فيه بنسمع في كلام ؟ و مفيش أمان ياريتنا نرجع زي زمان كل البنات حتي إللي لابسين عبايات فين القانون علشان يجيب حق البنات و لما الناس يتلموا يتقال " معلش خلاص " " ما كفاية بلاش فضايح ليه تلموا عليكوا الناس " ! لما نروح القسم نبلغ و نقول محناش ساكتين الناس يقولولنا إحنا مش شاهدين دايماً بنلاقي تبرير من الصغير للكبير و نشوف العيب و نسكت راح فين الضمير من قبل ما يعرفوا حصل إيه يسألوا كانت لابسة إيه ! و يلوموا علينا كتير ليييييه !! راضييين ده يحصل فينا ؟ ليه يجيبوا الغلط علينا ؟ ليه محدش حاسس بينا ؟ مهما إتكلمنا و إشتكينا متحسيش إن العيب فيكي لبسك شكلك و كلامك دي حاجة ترجع ليكي متخليش حد يلوم عليكي و أكيد في يوم هيحصل تغيير مش عايزة أرجع أسكت تاني مش هفضل خايفة طول حياتي مش عايزة أفكر و أشغل بالي ولا يجي حد يقولي عادي مش عايزة اخاف تاني !